ପ୍ରହସନ ପାଲଟିଛି ସଡ଼କ ସୁରକ୍ଷା

ଗତ ଜାନୁଆରୀ ୧ ରୁ ଜାନୁଆରୀ ୩୧ – ପାଳିତ ହେଉଛି ସଡକ ସୁରକ୍ଷା ମାସ । କିନ୍ତୁ ସତେ ଯେମିତି ଏହି ସଡକ ସୁରକ୍ଷା ପ୍ରହସନ ପାଲଟିଛି । ପ୍ରତ୍ୟେକ ଦିନ କେଉଁଠି ଟା କେଉଁଠି ଗଡୁଛି ମୁଣ୍ଡ ତ କେଉଁଠି ଧନ ଜୀବନ ନଷ୍ଟ ହେଉଛି । କେଉଁଠି ଡିଭାଇଡର ଉପରେ ଗାଡି ଚାଲୁଛି । ଆଉ ପ୍ରଶାସନ ଶୋଇଛି ଗଭିର ନିଦ୍ରାରେ । ପରିବହନ ବିଭାଗର ଆଖି ଫୁଟି ଯାଇଛି । ଡିଉଟି ନାମରେ ଫୁସ୍ । କେବଳ ସହର ଭିତରେ ୨-୪ ଟା ହୋଡିଂ ଛାଡିଦେଲେ କାଗଜ ପତ୍ରରେ ପାଳିତ ହେଉଛି ସଡକ ସୁରକ୍ଷା । ବିଭିନ୍ନ ଗଣ ମାଧ୍ୟମରେ ବାରମ୍ବାର ଦୁର୍ଘଟଣା ଜନିତ ଖବର ପରିବେଷଣ ହେଉଛି, ପ୍ରତ୍ୟେକ ଦିନ ଖବର କାଗଜରେ ଦୁର୍ଘଟଣା ଖବର ବାହାରୁଛି କିନ୍ତୁ ପୋଲିସ ଓ ପ୍ରଶାସନ ଗାନ୍ଧୀଜୀଙ୍କ ମାଙ୍କଡ ହୋଇ ବସିଛନ୍ତି । ସାଧାରଣ ଜନତାଙ୍କ ଚିନ୍ତା ହିଁ ନାହିଁ । କିଏ ମରୁଛି, କାହାର ଗୋଡ ଭାଙ୍ଗୁଛି – କିଏ ପଚାରେ । ସଡକ ସୁରକ୍ଷା ଚୁଲିକି ଯାଉ । ବାରମ୍ବାର ଅଭିଯୋଗ ହେଉଛି ରୋଡ୍ ସାଇଡ୍ ପାର୍କିଂ ହଟାଯାଉ, ଓଭର ସ୍ପିଡିଂ ପାଇଁ ଦୃଢ କାର୍ଯ୍ୟାନୁଷ୍ଠାନ ନିଆଯାଉ, ପେଟ୍ରୋଲିଂ ବଢାଯାଉ – ସବୁ ଫୁସ୍ । ଏଇ ମାସ ସଡକ ସୁରକ୍ଷା ଆରମ୍ଭ ହେବା ପରଠାରୁ କିଛିଟି ସାଇରନ୍ ବାଜୁଥିବା ମୋଟର ସାଇକଲ ବଡବିଲ ରେ ମଝିରେ ମଝିରେ ଟଏଁ ଟଏଁ କରି ସାଇରନ୍ ମାରି ବୁଲୁଥିବା ଦେଖିବାକୁ ମିଳୁଛି । କିନ୍ତୁ ସେ କିଛି କାମର ନୁହେଁ ।

ଯୋଡା-ଭଦ୍ରାସାହି-ବାରବାଙ୍କ – ଗୁଆଲି, ଏନ୍.ଏଚ୍-୫୨୦ ରେ ଜଗିଛି ଯମ । ମରଣ ଯନ୍ତା ପାଲଟିଛି ଏହି ରାସ୍ତା । ଘରୁ ବାହାରିବ – କିନ୍ତୁ ଭୁଲ୍ ରେ ବି ଏହି ରାସ୍ତା ଛୁଇଁବନି – ନହେଲେ ମରିବ । ପ୍ରତ୍ୟେକ ମାସ – ପ୍ରତ୍ୟେକ ଦିନ ଏହି ରାସ୍ତା ରେ ଦୁର୍ଘଟଣା ଘଟୁଛି । ଲୋକେ ପୋଲିସ କୁ ଖବର ଦେଉଛନ୍ତି – ପୋଲିସ ଆସୁଛି – ଗାଡି ଯବତ କରୁଛି – ଆହତଙ୍କୁ ଡାକ୍ତରଖାନା ପହଞ୍ଚାଉଛି । ବେଶ୍ ଏତିକି । ଏଇଟା ସବୁଦିନିଆ ଘଟଣା ।

ଭଦ୍ରାସାହି ଅଂଚଳରେ ଗୋଟିଏ ପଟ ରାସ୍ତା ବେଆଇନ୍ ପାର୍କିଂ ଯୋଗୁଁ ସବୁବେଳେ ଯାମ ରହୁଛି । ଫଳରେ ସ୍କୁଲ ବସ୍ ଗୁଡା ବାଧ୍ୟ ହୋଇ ରଙ୍ଗ ରୁଟ୍ ରେ ଯାଉଛନ୍ତି । ଅଭିଭାବକ ମାନେ ଜୀବନକୁ ପାଣି ଛଡାଇ ନିଜ ଛୋଟ ଛୋଟ ଛୁଆଙ୍କୁ ନେଇ ସ୍କୁଲ ଛାଡିବାକୁ ଯାଉଛନ୍ତି । ନିକଟ ଅତୀତରେ ଉଭରବ୍ରିଜରେ ଏପରି ସ୍କୁଲ ଛୁଆକୁ ନେଇ ସ୍କୁଲ ଆସୁଥିବା ବେଳେ ଏକ ପରିବାର ଚାଲିଯାଇଥିଲା ଏହି ଦୁର୍ଘଟଣାରେ । ଟ୍ରାଫିକ୍ କଣ୍ଟ୍ରୋଲ ନାମରେ ଭଦ୍ରାସାହିରେ କେବଳ ବଟି ଆଦାୟ କରି ଗାଡି ଗୁଡାକୁ ଛାଡି ଦେଉଥିବା ମଧ୍ୟ ଲୋକଙ୍କ ନଜରକୁ ଆସୁଛି, ଅଭିଯୋଗ ହେଉଛି । ଏ ବିଷୟରେ ତଦନ୍ତ ହେବା ଜରୁରୀ ।

National Highways Authority of India – ଭାରତୀୟ ଜାତୀୟ ରାଜପଥ ପ୍ରାଧିକରଣ –

୧) ଜାତୀୟ ରାଜପଥର ବିକାଶ, ରକ୍ଷଣାବେକ୍ଷଣ ଏବଂ ପରିଚାଳନା ଏବଂ ଏହା ସହିତ ଜଡିତ ଆନୁଷଙ୍ଗିକ ବିଷୟ ଗୁଡିକ ପାଇଁ ଦାୟୀ ।

୨) ଟ୍ରାଫିକ୍ ନିୟନ୍ତ୍ରଣ – NHAI ଜାତୀୟ ରାଜପଥରେ ଯାନବାହାନର ଗତି ନିୟନ୍ତ୍ରଣ କରିବା ।

୩) ସେବା ପ୍ରଦାନ – NHAI ପରାମର୍ଶ ଏବଂ ନିର୍ମାଣ ସେବା ପ୍ରଦାନ କରେ, ହୋଟେଲ, ରେଷ୍ଟୁରାଣ୍ଟ ଏବଂ ବିଶ୍ରମାଗାର ବିକାଶ ଏବଂ ରକ୍ଷଣାବେକ୍ଷଣ କରେ ।

୪) ଟୋଲ ଆଦାୟ – NHAI ଜାତୀୟ ରାଜପଥର ଟୋଲ୍ ହୋଇଥିବା ସ୍ଥାନରେ ରାସ୍ତା ବ୍ୟବହାରକାରୀଙ୍କ ଠାରୁ ଟୋଲ୍ ଆଦାୟ କରେ ।

କିନ୍ତୁ ଏହି ବିଭାଗ କେବଳ ଟୋଲ୍ ଆଦାୟ କରିବା ଛଡା ଅନ୍ୟ କିଛି କରିଲା ଭଳିଆ କାହିଁ ନଜରକୁ ଆସୁନାହିଁ । ନୂଆଁ ନୂଆଁ ତିଆରି ହୋଇଥିବା ରାସ୍ତା କେଉଁଠି ଆଁ କରି ଅନଉଛି ତ କେଉଠି ରାସ୍ତା ମଝିରେ ଖାଲ ହୋଇଗଲାଣି । କିନ୍ତୁ ବିଭାଗର ନଜର ନାହିଁ । ବିଭାଗର ଫିକର ଭି ନାହିଁ ।

ବିନା ହେଲମେଟ୍, ଡ୍ରାଇଭିଂ ଲାଇସେନ୍ସ ରେ ଗାଡି ଚଳେଇଲେ ଫାଇନ୍, ଗାଡିର କାଗଜ ପତ୍ର, ଇନ୍ସୁରେନ୍ସ – ପୋଲ୍ୟୁସନ ନଥିଲେ ଫାଇନ । କିନ୍ତୁ ରାସ୍ତା ମଝିରେ ଖାଲ – ଆଉ ଗାଡି ଚାଳକ ଖାଲରେ ପଡି ହାତ-ଗୋଡ ଭାଙ୍ଗୁଛି – ତାକୁ ଫାଇନ୍ କିଏ ଦବ ?

ଏ ଶହର କେବେ ସୁଧୁରିବନି । ଏଇମିତି ଚାଲିଥିବ । ଦୁର୍ଘଟଣା ଘଟୁଥିବ – ଲୋକେ ମରୁଥିବେ । ଆଉ ମଲା ଲୋକଙ୍କ ପରିବାରର କରୁଣ କାନ୍ଦଣା କେବେ ପହଞ୍ଚିବନି ପ୍ରଶାସନ କାନରେ ।