ବେଆଇନ୍ ଲୁହା ଖଣିଜ ବୋଝେଇ ଟ୍ରକ ଜବତ

ବଡ଼ବିଲ (୨୧.୦୩.୨୦୨୫): ଆଜି ବଡବିଲ ପୋଲିସ, ଲୁହା ଖଣିଜ ଚୋରା ଚାଲାଣ କରୁଥିବା ୩ ଜଣକୁ ଗିରଫ କରି କୋର୍ଟ ଚାଲାଣ କରିଥିବା ଜଣାଯାଇଛି । ପ୍ରାପ୍ତ ସୂଚନାନୁସାରେ ଗତ ୧୯.୦୩.୨୦୨୫ ଦିନ ପ୍ରାୟ ୦୪.୦୫ ସମୟରେ ବଡବିଲ ଥାନାର ପେଟ୍ରୋଲିଂ ଦଳ କୌଣସି ମତେ ସୂଚନା ପାଇଥିଲେ ଯେ ଏକ ୧୬ ଚକିଆ ଟ୍ରକ (OD 09 G 7564) ରେ ବେଆଇନ ଲୁହା ପଥର ବୋଝେଇ ହୋଇ ରାଇକା ଗ୍ରାମରୁ ସୋୟାବାଲି ଅଭିମୁଖେ ଆସୁଅଛି । ସୂଚନା ପାଇ ପେଟ୍ରୋଲିଂ ଦଳ ଘଟଣାସ୍ଥଳରେ ଶୀଘ୍ର ପହଞ୍ଚିବାକୁ ଚେଷ୍ଟା କରିଥିଲେ ହେଁ ଅଭିଯୁକ୍ତ ମାନେ ରାସ୍ତାର ବିଭିନ୍ନ ସ୍ଥାନରେ ପଥର ରଖି ରାସ୍ତା ଅବରୋଧ କରିଦେଇଥିଲେ । ଫଳରେ ପେଟ୍ରୋଲିଂ ଦଳ ଜଟେଶ୍ୱର ମନ୍ଦିର ଛକ ନିକଟରେ ପହଞ୍ଚିବା ପରେ ଦେଖିଲେ ଯେ ଏକ ଟ୍ରକ ରାସ୍ତା କଡରେ ଠିଆ ହୋଇଛି, କିନ୍ତୁ ଅଭିଯୁକ୍ତମାନେ ଘଟଣାସ୍ଥଳ ଛାଡି ଫେରାର ହୋଇଯାଇଛନ୍ତି । ଅଭିଯୁକ୍ତମାନଙ୍କୁ ଧରିବା ପାଇଁ ନିକଟସ୍ଥ ଜଙ୍ଗଲରେ ଖୋଜାଖୋଜି କରିଥିଲେ ହେଁ ତାଙ୍କୁ ଧରିବାରେ ସଫଳ ହୋଇନଥିଲେ । ପେଟ୍ରୋଲିଂ ଦଳ ଲୁହାପଥର ବୋଝେଇ ଟ୍ରକଟିକୁ ଜବତ କରିବା ସହିତ ବଡବିଲ ଥାନାରେ କେସ୍ ନମ୍ବର- 62 ତାରିଖ 19.03.2025 U/s- 303(2)/111/3(5) BNS/21 MMDR ଆଇନ ଅନୁସାରେ ମାମଲା ରୁଜୁ କରିଥିଲେ ।
ମାମଲା ପଂଜିକରଣ ପରେ ବିଭିନ୍ନ ସ୍ଥାନରେ ଚଢାଉ କରାଯାଇ ଶେଷରେ ଆଜି ଏହି ଘଟଣାରେ ଜଡିତ ଥିବା ୩ଜଣଙ୍କୁ ଗିରଫ କରାଯାଇଥିଲା । ଗିରଫ ୩ ଜଣ ସନ୍ତୋଷ ମୁଣ୍ଡା (୩୦), ପିତା – ସମରା ମୁଣ୍ଡା, ରାଇକା ଗ୍ରାମ, ନରେନ୍ଦ୍ର ମହାକୁଡ (୨୨),ପିତା ସ୍ୱ ଦିଲିପ ମହାକୁଡ, ରାଇକା ଗ୍ରାମ ଏବଂ ବିଶୁ ବାରିକ (୨୮), ପିତା – ଦୁଆନ ବାରିକ, ସୋୟାବଲି ଗ୍ରାମର ବାସିନ୍ଦା ଥିବାବେଳେ ଆଜି ସମସ୍ତଙ୍କୁ କୋର୍ଟ ଚାଲାଣ କରାଯାଇଥିବା ଜଣାଯାଇଛି । ତେବେ କେନ୍ଦୁଝର ଜିଲ୍ଲାର ବିଭିନ୍ନ ଅଂଚଳରୁ ୧୦ ରୁ ଅଧିକ ଲୋକଙ୍କ ଏକ ସିଣ୍ଡିକେଟ୍ ଏପରି ବେଆଇନ ବ୍ୟବସାୟ କରୁଥିବାବେଳେ ଏହି ମାମଲାରେ ଜଡିତ ସମସ୍ତ ମାଷ୍ଟର ମାଇଣ୍ଡକୁ ଧରିବା ପାଇଁ ପ୍ରୟାସ ଜାରି ରହିଥିବା ଜଣାଯାଇଛି ।

Post Views: 10